Dé mo kat pawòl.

Lésè é léfwè, chak lanné, dènyè simenm a mwa òktòb sé « Simen Entèrnasyonal pou lang é kilti kréyòl » ! Sé on bèl okazyon pou tout ti lilèt ki ka palé kréyòl mèt ho lang a-yo, kilti a-yo, tradisyon kréyòl a-yo. Es fò pa Légliz-la pwan plas a-y adan travay fondal-lasa pou moun apwann viv byen ansanm, é pou lévanjil-la trasé chimen a-y adan tout vi-lasa ?

« Bannzil Kréyòl 2020 », ka envité nou gadé an vérité ki jan nou lyanné èvè la Lwa, la nati, lajan, byen a latè, lakilti é èvè moun ki alantou-annou. Sé adan sé lyannaj-lasa nou ka konnèt ki kalité rèlasyon nou ni èvè Bondyé.
« Lalwa é lé profèt » ka fè nou konnèt volonté a Bondyé ki sé Lanmou é sa i ka atann dè nou : « Ou pé ké malméné moun-la ki sé on étranjé é ki ka rété asi tè a-w, ou pé ké èksplwaté-y davwa vou-menm, sonjé ou té on étranjé lè ou té an Ejip » (Ex 22,20) ; é ankò : « Si ou prété on moun a pèp an-mwen on lajan, ou on maléré adan fwè a-w, ou pé ké aji kon rapas èvè-y : ou pé ké chèché fè entéré asi tèt a-y » (Ex 22,24). Es nou vlé sé lwa-lasa ?

Moun ki ni dèvwa fè moun konnèt sé lwa-lasa yo menm pa ka viv yo ! Pli mové ankò ! Yo ka chèché pwan adan on zatrap, sèl moun-la ki ka akonpli « lalwa é lé profèt » : « An pa vini aboli lalwa men an vini pou réalizé-y » (Mt 5,17). « Lè lé Farizyen vin apwann Jézi té fèmè bouch a sé Sadiséyen-la, yo sanblé, é yonn adan yo, on Dòktè a lalwa, pozé Jézi kèssyon-lasa pou pwann-y adan on zatrap : « Mèt, adan tout sé lwa-la, kilès ki pli gwan konmanmman-la ? »

Jézikri ka mèt adan menm pannyé-la lanmou pou Bondyé é lanmou pou moun ki alantou-annou, tousa pou fè nou sòti adan lojik a : «ou pé fè sa », « ou pa ni dwa fè sa ».
Sé dé komanmman-la ka fè yonn ! Si nou pwan doubout sèlman asi lalwa, nou ka mèt dè koté sa ki pli enpòrtan : Si Bondyé bannou lalwa sé pou nou viv ansanm adan on méyè rèlasyon, pou nou enmé-nou é rèspèkté-nou plis. Sa ki anmègdan sé nou ka itilizé lalwa yenki lè sa ka ranjé-nou !

Bondyé-Sennyè, Pap Fwanswa ka mandé-nou chanjé vi annou pou nou sa anonsé Bon Nouvèl a Jézikri. Evè fèt a « Bannzil kréyòl-lasa », ki lyanné èvè rantré pastoral nou ja viv, rédé-nou viv komanmman a lanmou a-w é lanmou pou moun ki alantou-annou toupannan nou ka kenbé ansanm dé chimen nou chwazi :
1-Protéjé é rèspèkté Toutmoun é Kréasyon-la !
2-«Woupwan rèlasyon ant moun adan pawas-annou, an Gwadloup adan tousa nou ké fè gras a Pawòl a Bondyé”

Bondyé ka béni zòt tout !
Pasé on bèl simenm èvè Jézikri !

André, fwè a-zòt