Méditasyon an mwen 29 Oktob 2023.
Lésè é lé fwè nou paka oubliyé chak lanné dènyé dimanch a oktòb sé jouné enternasyonal pou lang é kilti kréyòl. Sé toujou on bèl okasyon pou tout moun ka palé kréyòl pòté ho douvan tout richès, mès é labitid a-yo. Sé okasyon osi pou nou ki ka kwè adan Jézikri, pou anonsé bon nouvèl a Jézikri adan lang, kilti é tradisyon annou.
Ka nou ka woutyenn adan pawòl-la jòdila ? Ka nou ni a mèt an pratik adan jouné entewnasyonal-lasa, men osi chak jou Bondyé ka ban nou ? Bondyé ki fè alyans avè pèp a-y i bay on Lwa pou-y té rété fidèl a lanmou a-y. E adan lwa-la ni on pawòl ka di : « Ou ké respekté tout étranjé ki vin an péyi-la ou péké maltrété-y ; davwa, zὸt osi zot té moun vini adan péyi Léjip » Ex 22,20. Sa vlé di sa ou vépa on moun fè-w, pa ou fè on dòt-li. Fò nou woutyenn osi Bondyé pé-é jan dakò avè pon kalité esklavaj é pwofitasyon. Pon moun pa dwètèt espwaté pon moun, ni pwofité si moun ki an féblès kon-y maké adan liv a Lègzòd: « Zὸt péké fè pwofitasyon asi madanm mari a-y mὸ, é asi timoun, papa-y mὸ. Si-w profité si yo, é yo hélé oti mwen, an ké kouté hélé a-yo. Kὸlè an mwen ké pwan difé é sé épi on épé an ké fè zὸt péri » Ex 21,23. Nou pépa ka kwè adan Bondyé ki Lanmou é viv népòt kijan an fanmi-la, an sosyété-la é an Légliz-la . Nou pépa kon mond-la toujou chèché entérè annou. Tousa nou ka di, tousa nou ka fè sé pou nou rann sèvis é enmé pwochen annou davwa Bondyé ka di nou « Si-w ka prété on maléré adan frè a-w lajan, ou péké pwofité asiy, ou péké fè-y péyé entérè ». Ex 21, 24. Annou rèkonnèt nou pa toujou adan larèl-lasa pou omwen dé rézon : tout sosyété-la sé lajan é entéré i ka mèt douvan. E dézyèm rézon péché-la adan nou é adan mond-la é nou ni a goumé kont-li pou rété fidèl a Alyans a Bondyé. Sé gran Grèk a Lwa-la, lé farizyen paté méyè ki nou, olé yo rété fidèl a Jézikri Bondyé voyé akonpli Lwa-la si la tè, yo té ka chèché trapé-y adan zatrap a-yo : « Mèt, kilès konmannman ki pli gran adan Lwa-la ? » Mt 22,36. Men Jézikri pa-a pèd fil a-y i rézimé bayo tout Lwa-la adan dé komannman : « Ou ké enmé Bondyé, Sennyè aw épi tout kyè a-w, épi tout nanm a-w é èvè tout lespwi a-w, é pwochen a-w kon-w menm ». Sé pousa i diyo : « Tout Lwa-la èvè tout sé pwofèt-la chouké adan dé konmannman-lasa » Mt 22,37b-40.
Ka nou ni a fè dòt ki chanjé kyè annou é tout vyé mès é labititid annou ki kontrè a Lévanjil-la ! Sé sa krétyen Tésalonik fè ! Sé pousa sen Pòl téka di yo : « Bon nouvèl a fwa a zòt an Bondyé Papa pran rasin tèlman byen toupatou ki fè nou pa menm bizwen palé dèsa ». Onlo moun ka di kijan vi a zòt chanjé pou viv plis an vérité avè Bondyé. Zòt lésé idòl tonbé pou sèvi Bondyé ki sé Lavérité é Lavi ; E zòt ka atann Gason a-y Jézikri i résisité, li ki ka délivré-nou anba kòlè a Bondyé ki ka vinn-la » 1 Th 1,8b-10. Wi fò nou sav ki bò nou yé ! Nou avè Jézikri ou nou kont Jézikri ? Annou pa oubliyé sa Jézikri di : « Sila-la kipa avè mwen kont mwen é sila ki paka sanblé avè mwen ou ka divisé » Mt 12,30. Jézikri Sennyè sé vré menm, sé silon chwa annou é konpowtasyon annou, nou ka anonsé bon nouvèl a Lanmou a-w. Ban nou fòs a lanmou a-w é onlo imilité pou enmé é sèvi pwochen annou kon ou montré nou , pou nou pa rantré an ripaj avè pon moun, men pou nou fè volonté a Bondyé Papa kon vou menm fè pou sovénou. AMEN . Pè Dénési